作為一個 bisexual , 今年終於去左 Pink Dot 。一出九龍站就見到唔少同樣著住粉紅色衫嘅同路人 ,雖然大家都係唔識嘅,但空氣之中好似已經有種了然於心嘅默契,知道大家嘅目的地都係一樣。

去 Pink Dot 之前我一直有個疑惑:點解 Pink Dot 要用粉紅色而唔係大路嘅彩虹做主題顏色呢? 原來 Pink Dot 係一個來自新加坡,旨在倡導「有愛無類」(freedom to love)年度戶外嘉年華。由2009年起 ,主辦機構每年都會鼓勵參加者著粉紅色衫。係高空望落去,每一粒「小粉紅點」就會匯集成一個巨型嘅「大粉紅點」,象徵群眾對共融多元的愛嘅支持。

Screen Shot 2017-10-28 at 9.30.27 PM

粉紅有兩層含意:粉紅色既係新加坡身份證顏色,亦經常被視為代表男同志「乸乸地」嘅顏色。擁抱粉紅,意思再明顯不過——就係將呢種對粉紅色的污名轉做驕傲嘅身份認同擁抱唔同形式嘅愛,同時都提醒大眾,即使性取向不一樣,大家都係同一個社會嘅公民,響同一個地方生活嘅人。

帶住呢個意識,我著住人生第一件粉紅色衫,跟住萍水相逢嘅粉紅人群走入西九文娛區。Pink Dot 係我參加過嘅LGBT平權活動入面氣氛比較輕鬆嘅,參加 Pink Dot 就好似去左一個大型 party 咁,有演唱會,有 DJ 打碟,有美食同遊戲攤位,有討論性小眾平權議題嘅講座,有手工藝工作坊,有人係草地野餐,有人攞住罐啤酒跳舞,好 chill 好 colourful 。

而呢果 party 最「特別」嘅係參加者嘅多元。Pink Dot 從來都唔係「LGBT ONLY」嘅活動。係呢片粉紅海入面,我見到手拖手嘅 gay couple/les couple/直 couple 、 drag queen  、 打扮「女性化」嘅男女、打扮「男性化」嘅男女,亦有一家大細嘅異性戀家庭。

腦內突然響起 Taylor Swift 嘅 Safe And Sound。係呢片草地上,無人需要因為自己喜歡嘅性別、喜歡嘅打扮、喜歡嘅人而懼怕惹來旁人非議側目,無人需要懼怕同所愛嘅人拖手親吻擁抱會被指指點點。係終於來臨嘅秋風下,一班有住同樣信念嘅人,一齊度過一個快樂美好嘅週未。

驟覺,係一片粉紅中見到彩虹。