Check out English version of “Menstrual cups bring women sex life back during period !” here

月經杯越來越普及,越來越受歡迎。用過嘅人都話係女性恩物,運動型女仔會同你講佢令你嚟 M 都可以清爽哋跑步做 gym ,鍾意去旅行嘅女仔會話你知佢令你嚟 M 都可以開開心心去日本浸溫泉去泰國游水,環保嘅女仔會同你講佢幫你一世人慳咗幾多條棉條幾多塊衛生巾總共幾多幾多錢。而我呢就準備話俾你知,月經杯令你嚟 M 都可以有性生活。

女仔都有性慾,我哋都經歷過月黑風高情到濃時先醒起「X!姨媽到啊…..」。如果你平時用開衛生巾咁我哋根本連底底都無可能除,如果你用嘅係棉條,咁恭喜你至少你嘅陰蒂都係自由而無血嘅。但大家作為女仔都好清楚有時熱辣辣嘅夏天會令棉條有點臭臭的,所以以前用棉條嘅時候我都唔會太想人哋接近我個妹。

但係我用左月經杯之後成個故事唔同晒。我另一半本身唔係香港住,基本上幾個月先見到一、兩個星期。上一次同女朋友相見就係咁啱撞正我姨媽到嘅日子。你幻想下牛郎織女一年先見得一次但相見嘅嗰一晚咁啱織女嚟M係有幾咁唔開心。但都無辦法啦,沖完涼放個 Fun Cup 入去至少可以唔著衫攬住瞓都好啊,乖乖地攬住係床傾下計囉。

咁但當然,血氣方剛嘅年輕人正常攬下就會錫下,錫下又會摸下,整下整下女朋友越錫越落已經去到啊妹妹度。正當我仲猶疑緊會唔會唔係幾好嘅時候佢已經錫咗落去,去到依個地步我已經無抗拒嘅能力,死就死啦!大家咁熟,食下我啲 M 啫!而轉眼之間其實佢隻手指已經入埋去,去到依個地步我更加無抗拒嘅能力,死就死啦!最多洗床單啫!然後,我哋就大戰咗 300 個回合。

出乎意料嘅係佢話一啲異味都無,而且床單都無污糟。Oral 嘅部份其實同平時無分別一樣咁開心,而手指入去嘅時候感覺係會比平時強烈少少,因為陰道有個杯喺到會窄咗,所以除咗我嘅天然分泌之外都加咗少少潤滑劑。完事之後個杯比我平時放佢嘅位置入咗啲,陰道要輕輕用力推佢出嚟。但整體嚟講,其實同我地平時嘅過程一樣咁享受!

當然係我返到嚟香港之後我好似發現新大陸咁同我啲同事們分享啦,但原來係 Fun Cup 嘅說明書上面一早寫咗:

IMAG0765

所以,故事嘅結論係:如果你想係月經時攞返少少身體嘅自主權,性愛自主權,你應該要試下用月經杯!另外要提醒大家注意另一半嘅意願和身體狀態,有女仔月經時特別有性慾,都有女仔月經期間特別唔舒服而唔想要㗎,要尊重返女仔嘅意願~