All shops open as usual.
Please remember to wear a mask before entering our stores. For the safety of our customers and staffs, our fitting room will be out of service temporarily.
【 初體驗蝦碌日記 】
月經杯大冒險!
Article: 小旋風 | Photo: 小旋風 | 26 Sep 2017
Aa
Aa
Aa

前言:大家好!我係新嚟 Sally’s Toy 嘅小旋風! 事緣最近老細 Vera & Picco 比左兩個月經杯比我試用下,老細咁抵得諗,我唔寫 Review 都唔是人吧。於是有咗呢篇勇者月經杯觀察日記嘅誕生!

【19/8/2017】

我有嘅月經杯:圖左係Fun Factory Fun Cup Size A 粉紅色;圖右係 FemmyCycle 亞洲女士尺寸,顏色透明。

我有嘅月經杯:圖左係Fun Factory Fun Cup Size A 粉紅色;圖右係 FemmyCycle 亞洲女士尺寸(Teen),顏色透明。呢兩個杯都係適合低子宮頸嘅我用。想簡杯,最好睇下量度子宮頸嘅教學或者fb inbox我地問下資深同事嘅專業意見喔

今朝出門口時發現嚟M,不過從未用過月經杯,又趕住出門,本來都係諗住用M巾頂住先。但發現M巾已用完!!!天意要我今日用月經杯,唯有頂硬上啦。

giphy (10)
一開始係試用 Teen ,諗住容量比較多,可以應付到由朝到晚既需求,啱曬我呢種懶人。但經過一輪生死搏斗,發現 Teen 對入門者算係比較難上手,好易就會未入曬就彈開,入左一半就失敗,拎返出嚟既情形,就會好似兇案現場咁血跡斑斑。(後來先知原來識入好易入:Teen 教學影片)趕時間既我,即刻捨難取易,用 Fun Cup ,摸索左幾分鐘就成功放咗入去了。即刻衝去返工 !

搭地鐵返工時,無左嚟M時「黐笠笠」既感覺,真係爽。坐係公司過左兩三個鐘,因為呢個 Size A 嘅 Fun Cup 既容量比較小,有啲緊張驚會漏。於是我就諗住去公司廁所拎返出嚟,倒下血先。結果,都係因為太緊張完全放鬆唔到陰道,艱難地用咗半個鐘抆返個杯出嚟,佢以一個華麗既拋物線直落公司馬桶⋯⋯⋯giphy (12)

今日既月經杯挑戰嚟到呢度,係時候鳴金收兵⋯⋯聽日再續⋯⋯

【20/8/2017】

今朝返工之前,時間比較充裕。決定試用 Teen!用之前放個月經杯係杯熱水度消毒一下,之後就加埋少少水性潤滑劑,努力摺好個杯放進去,最初都彈開左兩次,第三次就成功了!全程都之不過三分鐘左右,比起琴日真係飛躍進步。

giphy (9)

之後返工搭鐵又或者坐係公司做野,全日都冇feel到任何異物感,甚至唔覺得自己嚟緊M,完全冇平時個種M巾痴住下面結遢遢嘅感覺!新買用嚟防漏既細護墊都完全用唔上,因為根本一滴都冇漏~用緊嘅時侯,去小便都係完全唔需要拎出嚟~好方便~

由於我懶到出汁,就算開大,我都冇拎出嚟……經我實證,係 work 嘅!(危險動作切勿模仿,係我呢啲天賦異稟嘅人先會做到。聽聞有人去大時,一用力痾埋個杯出嚟,可想而知個場面會幾咁慘烈……所以風險幾大,大家評估下值唔值得搏啦……)

Teen最厲害之處就係超大容量,可以由返工到放工到返屋企成十幾個鐘,都唔洗拎出嚟倒血,簡直係月經初期流量多嘅救星!沖涼時,順便拎個杯出嚟倒血,清洗完又可以放返入去,度過一個安眠嘅夜晚,再唔洗擔心經血流到成張床單都要洗,嗚,真係懶人福音。

【18/9/2017】

圖中嘅真空防菌收納袋係隨Fun Cup附送,方便拎出街用。

圖中嘅真空防菌收納袋係隨Fun Cup附送,方便拎出街用。

上次經期因為月經杯,有個好新奇嘅體驗。隔左一個月,今日返返下工時突然覺得有啲唔對路,果然提早咗嚟M!好彩隨身袋住Fun Cup個防菌收納袋,所以Fun Cup可以用嚟救急。於是有驚無險地又度過左一個美好嘅工作日。

今次我拎 Fun Cup 出嚟倒血時醒目啦,首先紮好個馬,之後用開大既力(但係又唔好真係開大~)就好易可以咇到Fun Cup出左少少,再用手就可以好易拎出嚟啦。同埋老細 Vera 都提我最好倒血前後,都用Hyginova 消毒噴霧噴下手同杯,先將杯放返入陰道,咁先衛生!
giphy (5)

識用月經杯之後好有成功感,對自己嘅身體多咗了解之餘,經期都可以好舒服好清爽。同我嘅月經杯 BB相見恨晚,仲有好多野未試做過,因為上述日子全部都要返工,好期待戴住佢去跑步!游水!去旅行!仲有試用其他類型嘅杯!到左依家,我終於明白另一個 Stylist 同事 Miki 所講,用咗月經杯之後,就會好期待每一次經期嘅來臨。

 

 

Related Products
Related Stories



© 2010-2020 Sally's Toy - Redefining Sex Toys, Sex Shops